هم‌زمان با دومین سال سقوط نظام جمهوری افغانستان، تاجیکستان شمار پاسگاه‌های مرزی با افغانستان را به بیش از ۱۰۰ پاسگاه افزایش داده است.
امام‌علی رحمان، رئیس‌جمهوری تاجیکستان، روز سه‌شنبه(۱۵ آگوست۲۴ اسد) چند پاسگاه مرزی جدید را در مناطق خودمختار بدخشان، مرغاب، اشکاشم، روشان، فروخور، شمس‌الدین شاهین، و پنج منطقه ختلان افتتاح کرد.
در‌‌خبرنامه‌ای که از سوی دفتر مطبوعاتی ریاست جمهوری تاجیکستان نشر شده آمده است که کار ساخت‌وساز تاسیسات نظامی در فوریه امسال آغاز شده بود و ساختمان پاسگاه‌های مرزی با توجه به اوضاع کنونی در مدت کوتاهی به بهره‌برداری رسیده است.
رئیس‌جمهوری تاجیکستان تاکید کرد که مرزبانان این کشور با هر نوع تهدید، به‌ویژه قاچاق مواد مخدر و «جنایت فراملی»، مبارزه می‌کنند.
در همین حال در نشستی که از سوی بنیاد احمدشاه مسعود و آکادمی ملی علوم جمهوری تاجیکستان در این شهر برگزار شده بود کارشناسان منطقه گفته اند که طالبان به دنبال جنگ فرامرزی هستند.
این کارشناسان معتقدند که افغانستان بعد از به قدرت رسیدن طالبان به کانون امن تروریستان تبدیل شده و امنیت منطقه و جهان را تهدید می‌کنند.
