امام‌علی رحمان، رییس‌جمهوری تاجیکستان از افزایش فعالیت‌های گروه‌های تروریستی در خاک افغانستان ابراز نگرانی کرده‌است.
به گزارش «آسیاپلس»، رییس‌جمهوری تاجیکستان این سخنان را روز پنج‌شنبه ( ۲۳ سنبله/۱۴ سپتامبر) در جریان پنجمین نشست سران کشورهای آسیای مرکزی بیان کرده‌است.
رهبر تاجیکستان در بخشی از سخنانش با اشاره به مشکلات افغانستان افزود: ما افزایش فعالیت‌های گروه‌های مختلف تروریستی در خاک افغانستان را احساس می‌کنیم. در سال‌های اخیر ما با تلاش‌های گروه‌های مختلف تروریستی برای نفوذ و عبور غیر قانونی از مرزهای دولتی مواجه بوده‌ایم.
آقای رحمان در ادامه‌ی سخن‌رانی خود گفته است که «چندی پیش ما از دو تلاش شبه‌نظامیان برای شکستن مرز جلوگیری کرده ایم. هدف آنها انجام حملات تروریستی در پایتخت و سایر نقاط تاجیکستان بود.»
رهبر تاجیکستان هم‌چنان با اشاره به افزایش تلاش‌های گروه‌های تروریستی برای نفوذ به مرزهای تاجیکستان، خاطر نشان کرده که حجم قاچاق مواد مخدر نیز افزایش یافته است.
این نگرانی‌ها در حالی از سوی رییس‌جمهوری تاجیکستان مطرح می‌شود که هفته‌ی گذشته سه تن از افراد گروه «تروریستی انصارالله» در درگیری با نظامیان تاجیکستانی، در زمان تلاش برای عبور از مرز کشته شدند.
با این حال امام‌علی رحمان تاکید کرده که «کشورهای منطقه در چنین شرایطی باید با هم متحدانه همکاری کنند و امنیت را در اولویت کار خود قرار دهند.»
