صدای شهروند: ویب‌سایت المرصاد، پایگاه نشراتی استخبارات طالبان با نشر مقاله‌ای گفته‌است که امام‌علی رحمان‌اُف رییس‌جمهور تاجیکستان «محرک» داعش است.
ویب‌سایت تبلیغاتی اداره‌ی استخبارات طالبان، موسوم به «المرصاد» در مطلبی که امروز پنج‌شنبه (۳۰سنبله/۲۱سپتامبر) نشر شده، نوشته‌است که امام‌علی رحمان‌اف، رییس‌جمهوری «کمونیست» تاجیکستان، بی‌شرمانه ادعا کرده‌است که طالبان در مدارس «دینی» به کودکان خردسال آموزش‌های تروریستی می‌دهد.
المرصاد با لحن تند گفته است که اگر رحمان‌اف «کمونیست» دین، وجدان و حس حسن هم‌جواری داشت، هرگز طالبان را به جای صلح و آرامش به جنگ و تروریسم ربط نمی‌داد.
المرصاد در این مطلب گفته‌است که ما شواهد روشنی داریم که در میان جوانان فریب‌خورده و خالی از فکر تاجیکستان، جوانان سلفی این کشوراند که طعمه‌ی تبلیغات داعش شده‌اند.
علاوه بر این، تعداد زیادی از شهروندان تاجیک در زندان‌های ما هستند که از تاجیکستان وارد افغانستان شده و در بسیاری از حملات تروریستی شرکت کرده‌اند.
المرصاد با لحن پرسشی نوشته که «با وجود این همه دلیل‌ها طالبان تروریست‌پروراند یا تاجکیستان؟»
نویسنده‌ی مطلب از رییس‌جمهوری تاجیکستان خواسته است که خود را دست نشانده‌ی «امپریالیسم» نسازد، توطیه‌های پنهانی غرب را در کشورهای همسایه و منطقه اجرا نکند.
در اخیر این مطلب آمده‌است که داعش با کمک غربی‌ها با مسلمانان و گروه‌های جهادی مبارزه می‌کند و خود را مجری اسلام واقعی و شریعت به جهانیان معرفی می‌کند. با این کار نه تنها مسلمانان بلکه اسلام را دین توحش و بربریت معرفی می‌کند.
این مطلب از سوی ویب‌سایت المرصاد در حالی نشر می‌شود که رییس‌جمهوری تاجیکستان از حضور گروه تروریستی در افغانستان ابرازی نگرانی کرده‌است.
