پتراس اوشتراویچوس، رییس هیات پارلمان اروپا برای افغانستان، از حادثه مرگبار ناشی از زلزله روز شنبه در استان هرات اظهار تاسف کرد.
رییس هیات پارلمان اروپا برای افغانستان، گفته است این زمین لرزه در زمانی رخ داده است که افغانستان با یکی از شدیدترین بحران‌های انسانی و چندین فاجعه طبیعی که باعث گرسنگی، ناامنی و آوارگی می‌شود، مواجه گردیده است.
هیات پارلمانی روز دوشنبه (۱۷ میزان/ ۹ اکتوبر) طی یک بیانیه‌‌ای اعلام داشته است که پارلمان اروپا در کنار مردم آسیب دیده هرات در افغانستان می‌ایستد.
هیات پارلمان اروپا برای افغانستان از واکنش سریع آژانس‌های سازمان ملل متحد، سازمان‌های غیردولتی، کمیته بین‌المللی صلیب سرخ و کمک مالی کشورهای عضواتحادیه‌ی اروپا اظهار قدردانی کرده است.
این هیات پارلمانی برای افغانستان خواهان یک اقدام مشترک بین‌المللی شده است تا هرچه زودتر کمک‌های لازم امدادرسانی به شهروندان افغانستانی صورت گیرد.
پارلمان اروپا خواستار اقدام مشترک بین‌المللی برای آسیب دیدگان زلزله هرات شد
